Bakit nga ba nagbabago ang singil sa kuryente kada buwan?

April 16, 2026

The Energy Regulatory Commission (ERC) Advisory

La Paz MCO, wagi sa TARELCO II Digital Poster Making Contest

Angelica Marie C. Tanglao | February 2026

Itinanghal bilang 1st place si Raycand Abraham sa 2026 TARELCO II Digital Poster Making Contest na isinagawa ng TARELCO II bilang bahagi ng pagdiriwang sa 30th Annual General Membership Assembly (AGMA) ng kooperatiba.

Ginawaran ng parangal si Abraham, 39 taong gulang, mula sa Comillas La Paz, sa ginanap na awarding ceremony nitong ika-23 ng Pebrero, 2026 sa TARELCO II Main Office sa Concepcion, Tarlac.

Mula sa kabuuang 39 na kalahok, nanaig ang disenyo ni Abraham at nakamit ang P10,000 cash prize na may kasamang Certificate of Recognition. Ang kanyang obra ay gagamitin bilang opisyal na pabalat ng souvenir program ng 30th AGMA na may temang “TARELCO II POWER: Governance Stronger, Service Smarter, Future Brighter.”

Sumunod sa puwesto si John Michael Villapaña mula Alfonso, Concepcion na nakakuha ng 2nd place at premyong P7,000, habang si Gerald Ronquillo ng Rizal, La Paz ang nagkamit ng 3rd place at tumanggap ng P5,000 cash prize at Certificate of Recognition, kapwa may kasamang Certificate of Recognition.

Pinangunahan nina Engr. Antonio S. David (Concepcion Director), Dir. Sonia B. Sangalang (Bamban Director), Dir. Francisco L. Gabriel Jr. (Zaragoza Director), Officer-in-Charge Ronnie B. Mangalindan, at Institutional Services Department (ISD) Manager Jesus B. Bruno ang pagbibigay ng cash prize at certificates sa mga nagwagi.

Nagpaabot ng taos-pusong pasasalamat ang Board at Management sa mga MCOs na nagpakita ng interes at ipinamalas ang kanilang husay sa sining ng pagdidisenyo. Dahil karamihan sa mga nagwagi ay mga estudyante, mahalaga na patuloy nilang hasain ang kanilang talento, igalang at pahalagahan ang kanilang mga magulang, at magsikap sa pag-aaral upang maabot ang mas maliwanag na kinabukasan. Hinikayat din ang bawat kalahok na nasa awarding ceremony na patuloy nilang hasain ang kanilang talento at lumikha nang may pagkakaisa ng puso at isip, upang ang bawat likha ay maging makabuluhan at inspirasyon sa iba.

Bukod sa mga naunang nabanggit, tumanggap din ng tig-P2,000 cash at Certificate of Appreciation mula sa TARELCO II ang mga special awardees na napili ng mga hurado: Arcel I. De Jesus (Concepcion), Chester Martin C. Quibuyen (Concepcion), John Paul Cabigting (Capas), Monrico Miguel U. Humilde (Capas), Patricia Joy B. Daga (Zaragoza), Shenayah Loise P. Catacutan (Concepcion), at Zyra Joy R. Buenafe (Bamban).

La Paz at Zaragoza Directors, "Unopposed'
Bagong La Paz Director, Kilalanin

February 2025

Idineklarang panalo bilang La Paz Director si Engr. Jasper “Apel” Sotto matapos nitong makuha ang mas mataas na bilang ng boto kumpara sa nag-iisa nitong kalaban sa naganap na eleksyon sa kanilang distrito ngayong Pebrero 2026 at nanatiling walang katunggali sina Concepcion Director Engr. Antonio S. David at Zaragoza Director Francisco L. Gabriel, Jr., kaya muling inihalal sila sa kanilang ikalawang termino bilang director ng kanilang bayan.

Sa pagtatapos ng official canvassing ng mga boto na pinangasiwaan ng nahirang na mga miyembro ng District Election Committee (DECOM) na sina Paz S. Angeles (Chairperson), Thelma T. Cancio (Secretary), at Jannette M. Manalo (Member), nangibabaw si Sotto at nakapagtala ng 3,029 votes, na mas mataas kumpara sa katunggali nitong si Ferdinand Macalinao na nakakuha ng 2,706 votes noong Pebrero 14, 2026.

Kaagapay ng kooperatiba ang mga guro ng La Paz District bilang Precinct Election Committee (PECOM) sa matagumpay na pagsasagawa ng halalan sa 21 na barangay sa La Paz at Villa Bacolor, Tarlac na pinagbotohan ng 34.53% mula sa 16,717 na kuwalipikadong botante ng nabanggit na bayan. Pasok ang porsyentong nabanggit sa Key Performance Standards (KPS) na ipinalabas ng National Electrification Administration (NEA) upang maideklara ang “successfully held district election”.

Bago ang naganap na eleksyon, masusing pinaghandaan ng TARELCO II ang bawat kagamitang kakailanganin upang masiguro sa mga kandidato at botante ang patas na halalan. Sumailalim sa orientation ang bawat kandidato, miyembro ng DECOM at PECOM, watchers, at empleyado para maidaos nang matiwasay ang eleksyon.

Uupo bilang direktor si Sotto para sa kanyang unang termino pagkaraang manumpa ito sa tungkulin kasabay ng pagdiriwang ng 30th Annual General Membership Assembly (30th AGMA) na gaganapin sa Marso 27, 2026.

Samantala, napanatili ni Engr. David ang pagiging direktor ng distrito ng Concepcion, matapos na wala itong kalaban sa itinakdang eleksiyon na ginanap nitong nakalipas na Pebrero 7, 2026. Gayundin kay incumbent director Gabriel, na nag-iisang nagpahayag ng kandidatura para sa halalan ng direktor sa Zaragoza.

Bagamat walang naging katunggali ang incumbent directors, isinulong ng TARELCO II ang pagbubukas ng botohan sa Concepcion at Zaragoza.

Isinagawa ang eleksyon ng Concepcion noong Pebrero 7, 2026 na pinangunahan ng DECOM na sina Maximo Baluyut, Jr. (Chairperson), Teresito Sangil (Secretary), at Jesus Cunanan (Member). Nakalikom ang eleksyon ng Concepcion ng 130 votes.

Sa dako naman ng Zaragoza District, idinaos ang halalan noong Pebrero 21, 2026 kung saan nakakuha ng 142 votes si incumbent director Gabriel sa pangangasiwa ng naatasang DECOM na sina Miguel V. Lising (Chairperson), Josefina G. Tomas (Secretary), at Alfredo S. Roque (Member).

Naiproklama ang dalawang unopposed directors sa mismong araw din ng halalan kung saan kapwa magsisilbi sila ng kanilang ikalawang termino hanggang 2029.

Liwanag sa Kabundukan: TARELCO II, Nagkaloob ng Bagong Solar Panels sa 40 Pamilyang Aeta sa Sitio Dalig

January 29, 2026

Matagumpay na napalitan at naikabit ng TARELCO II ang walong (8) 580-watt solar panels sa Sitio Dalig, Sta. Juliana, Capas, Tarlac, na maghahatid ng tuloy-tuloy na suplay ng kuryente sa humigit-kumulang 40 kabahayan ng mga katutubong Aeta sa lugar.

Nagsimula ang inisyatiba matapos mag-Facebook Live noong Disyembre 17, 2025 si Pastor Joepet Rueda upang humingi ng tulong dahil sa pagkasira ng solar panel ng sitio dulot ng mga nagdaang bagyo at pagkaluma rin ng kagamitan. Nakarating ang panawagan sa National Electrification Administration (NEA), na agad namang nag-utos kay TARELCO II Project Supervisor at Acting General Manager, Engr. Loreto A. Marcelino, na tugunan ang pangangailangan ng komunidad.

Noong Enero 8, nakipag-ugnayan ang TARELCO II sa mga opisyal ng Brgy. Sta. Juliana at nagtungo sa sitio kung saan personal nilang nakausap ang mga residente at ang Chieftain ng komunidad. Kinabukasan, nagsagawa sila ng masusing pagsusuri at testing sa mga nasirang solar panel upang matukoy ang lawak ng pinsalang natamo ng mga ito. Pagkatapos ng pagsusuri, agad silang nag-request ng mga kinakailangang materyales na pinondohan ng kooperatiba upang mapabilis ang proseso ng pagkukumpuni.

Humarap sa ilang hamon ang mga empleyado ng TARELCO II sapagkat kinakailangan pa nilang tumawid sa sapa bago marating ang mismong sitio. Hindi rin naging madali ang misyon dahil malayo sa kabayanan ang sitio, at limitado lang ang kagamitan sa lugar. Sa kabila nito, noong Enero 29 ay nagtulungan ang TARELCO II at mga residente sa pag-akyat at pagdadala ng mga bagong solar panel mula sa paanan ng bundok patungo sa sitio.

Sa pangunguna ng Technical Services Department (TSD), katuwang ang mga opisyal ng Sta. Juliana sa koordinasyon at pakikipag-ugnayan sa komunidad, at sa tulong ni Engr. Michael Jenn Manguerra sa pag-abot sa liblib na lugar, matagumpay na naibalik ang suplay ng kuryente sa sitio bago matapos ang buwan.

Kabilang sa isinagawa ang pagtatanggal ng mga lumang solar panel, pagtatayo ng matibay na frame para sa mga panel, aktwal na pag-install ng walong 580-watt solar panel, at masusing pagsusuri ng solar panel breakers upang matiyak na ligtas at maayos ang operasyon nito.

Patunay ang proyektong ito sa patuloy na adhikain ng TARELCO II na maihatid ang liwanag at pag-asa sa mga pamayanang nasa kabundukan lalong-lalo na sa mga kapatid na katutubo. Isa itong konkretong hakbang tungo sa inklusibo at elektripikasyon para sa lahat.

TARELCO II: Sentro ng Kaalaman at Benchmarking ng mga Electric Cooperatives

Mayette Mungcal-Severano | January 2026

Bilang patunay sa patuloy na pagtutulungan ng mga electric cooperatives (EC) para sa mas matibay at epektibong serbisyong kuryente sa mga member-consumer-owners (MCOs), sunud-sunod na binisita ng limang (5) kapwa-EC ang TARELCO II para sa Benchmarking Activity na nakatuon sa operasyon at natatanging pamamaraan ng kooperatiba.

Sa kabila ng distansya ng iilang ECs, pinursigi ng Pampanga Rural Electric Service Cooperative, Inc. (PRESCO), Peninsula Electric Cooperative, Inc. (PENELCO), Isabela II Electric Cooperative (ISELCO II), Pampanga I Electric Cooperative Inc. (PELCO I), at Cebu II Electric Cooperative, Inc. (CEBECO II), ang pagdayo sa TARELCO II Main Office sa Concepcion, Tarlac upang makapulot ng mahahalagang kaalaman sa pamamahala at operasyon ng kooperatiba.

Noong Enero 21, binisita ng PRESCO ang TARELCO II Technical Services Department – Special Equipment Division (TSD-Special Equipment) upang pag-aralan ang Supervisory Control and Data Acquisition (SCADA) at palakasin ang kanilang kapasidad sa system monitoring. Kabilang sa kanilang agenda ang pagtatanong sa naging paghahanda sa regulatory compliance ng TARELCO II sa Energy Regulatory Commission, na pinaunlakan naman ng Corporate Planning Department (CPD).

Kasunod nito, noong Enero 22, tinalakay ng TSD sa mga empleyado ng PENELCO ang estratehiya sa pagsasaayos ng mga naiwan o nakabitin na kable ng telepono at internet sa mga poste ng kuryente. Binigyang-diin ang kahalagahan ng maayos at organisadong pagkakalatag ng mga linya para sa kaligtasan ng komunidad at mas maaasahang serbisyo para sa MCOs. Napukaw din ang interes ng mga bisita sa operasyon ng MCO Service Center at sa papel nito sa pagpapabilis ng pagresponde ng mga lineman sa franchise area.

Noong Pebrero 12, bumisita ang ISELCO II upang pag-aralan ang SCADA at Geographic Information System (GIS) ng TARELCO II. Binanggit sa diskusyon ang mga benepisyo ng sentralisadong command center, hands-on system installation, at pagkakaroon ng back-up communication. Sa GIS naman, tinalakay na dapat magkatuwang ang lahat ng software platforms upang masiguro ang mas mabilis at mabisang pamamahala ng work orders, outage response, at data analysis. Ipinakita rin ang aktwal na operasyon ng SCADA at GIS sa mga bisita upang mas lalo nilang itong maunawaan.

Nakatuon naman ang pagbisita ng PELCO I noong Pebrero 13 sa Computerized Accounting System at pagsunod sa mga regulasyon ng Bureau of Internal Revenue (BIR). Sa pangunguna ng TARELCO II Finance Services Department (FSD), tinalakay ang mga proseso, estratehiya, at updates ng kooperatiba alinsunod sa mandato ng BIR Ease of Paying Taxes Act. Naitampok dito ang masusing koordinasyon sa Information Technology Department (ITD) upang masiguro ang tuloy-tuloy na pag-update sa sistema, na nakakatulong sa mas mabilis na pagproseso at pagsusumite ng mga kinakailangang dokumento.

Sa ikalawang pagbisita ng mga kinatawan ng PENELCO noong Pebrero 16, ipinamalas ng TARELCO II, sa pangunguna ng ITD, ang paggamit ng LoRaWAN technology. Inilunsad ito bilang backup sa fiber optic connectivity, partikular sa pagsuporta sa network communications at metering systems bilang hakbang sa pagsunod sa Smart Grid Policy Framework ng Department of Energy (DOE). Kabilang sa mga nailahad ay ang benepisyo ng LoRaWAN sa mga rural electric cooperatives at ilang contingency programs upang matiyak ang tuloy-tuloy na serbisyo sa kabila ng anumang sitwasyon.

Samantala, noong Pebrero 18, tinungo ng CEBECO II ang kooperatiba upang pag-aralan ang polisiya sa disconnection at ang epektibong pagpapatupad nito alinsunod sa Magna Carta for Electricity Consumers. Ibinahagi ng Special Operations Group (SOG) ang kahalagahan ng maiiging kordinasyon sa mga empleyadong kabilang sa proseso ng disconnection upang masiguro ang maayos na usad ng trabaho at mapanatili ang magandang ugnayan sa mga MCO. Nagpakita rin ng malaking interes ang Board of Directors ng CEBECO II sa mga programa ng kooperatiba tulad ng Barangay Collection Agent at Burial Assistance Benefit, at nagtanong ng mga mahahalagang detalye ukol sa pagpapatupad ng mga ito sa komunidad.

Sa ilang dekadang paglilingkod, naging kilala ang TARELCO II sa kapwa electric cooperatives, kaya’t madalas itong pinipiling bisitahin ng ibang EC at ng ilang institusyon sa industriya. Matatandaan na kabilang ito sa mga binisita ng National Rural Electric Cooperative Association (NRECA) International noong 2024, kung saan ibinahagi ang kasaysayan ng kooperatiba at progreso ng kooperatiba mula sa pagkakatatag hanggang sa kasalukuyan, bilang inspirasyon at gabay sa mga nagsisimula sa larangan ng elektripikasyon.

From Blood Bags to Bagging a Special Award: TARELCO II garners recognition from PH Red Cross

Kath Leen Kaye Mayled | November 28, 2025

For its active participation through its annual bloodletting activities, Tarlac II Electric Cooperative, Inc. (TARELCO II) received a Special Award during the 3rd Central Kadugo Awarding Ceremony held on November 28, 2025, at Hilton Clark, Angeles, Pampanga.

The event spearheaded by the Philippine Red Cross extends its sincerest appreciation to all partners and awardees’ consistent support and dedication that has significantly contributed to strengthening the blood supply and advancing humanitarian efforts in the community – especially in Tarlac Province.

The award was received by Board Directors Eliseo A. Rivera and Sonia B. Sangalang, - on behalf of TARELCO II. It was formally presented by the esteemed Board Members of Philippine Red Cross: Mr. Luciano L. Paras, Jr.; Tarlac 2nd District Board Member Harmes Sembrano; Atty. Eliseo Martinez; Mr. Rivo Raymundo Nisce; and Tarlac City Councilor Anne Belmonte.

Through this event, TARELCO II has been recognized for its unwavering commitment and invaluable support in continuous promotion of voluntary blood donation in order to help save countless lives across the province.

Awards were also conferred upon various sectors across the province, including the Provincial Government of Tarlac; the City Government of Tarlac; and the Municipalities of Paniqui, Camiling, La Paz, Sta. Ignacia, San Clemente, Moncada, Anao, Mayantoc, Concepcion, Capas, Victoria, Pura, Gerona, San Manuel, and Ramos. Recognized as well were partner institutions and organizations such as the International Wiring System (Phils.) Corporation; Training Command, Philippine Army (TRACOM); Tarlac Agricultural University; Señor Sto. Niño Hospital; Tarlac Medical Society; Brookside Group of Companies; Charoen Pokphand Foods; Colegio de Tarlac; MCGI; Armor Division Infantry; Don Bosco Past Pupils Association; and St. Rose College Foundation, Inc.

The inclusion of TARELCO II in the 3rd Central Kadugo Awarding Ceremony proves that the Cooperative is innately service-oriented not only in providing electric service but also in aspects that uplifts the member-consumer-owners and the society. Behind every recognition is a story of compassion, employees who volunteered, leaders who supported initiatives and donors who selflessly gave a part of themselves to save others. Each partnership represents lives touched, families comforted, and hope restored.

Mga “Sundalo ng Pailaw” ng TARELCO II, Nagbigay-Liwanag sa Nueva Vizcaya

Kimberly Q. Aguilar | November 13, 2025

Bilang pakikiisa sa mga lalawigang lubhang naapektuhan ng Super Typhoon Uwan noong ika-13 ng Nobyembre 2025, nagpadala ang Tarlac II Electric Cooperative, Inc. (TARELCO II) ng pitong (7) kinatawan upang tumulong sa pagpapanumbalik ng suplay ng kuryente sa lalawigan ng Dupax Del Norte, Nueva Vizcaya.

Isinagawa ang deployment sa ilalim ng Task Force Kapatid (TFK) na isang inisyatiba ng National Electrification Administration (NEA) at Philippine Rural Electric Cooperatives Association Inc. (PHILRECA). Layunin ng programang ito na pagtibayin ang diwa ng bayanihan at pagtutulungan ng mga electric cooperatives (ECs) sa buong bansa lalo na sa panahon ng kalamidad.

Nagkaloob ang TARELCO II ng tulong-teknikal at karagdagang lakas-paggawa sa NUVELCO nang humigit-kumulang isang (1) buwan upang mapabilis at matiyak ang ligtas na pagbabalik ng kuryente sa mga apektadong pamayanan.

Sa kabuuan, labing-isang (11) kawani ng TARELCO II na binubuo nina Arnold Manguerra, Jeffrey Galang, Rogelio Samson Jr., Aaron Balatbat, Christian John Masiclat, Marnel Punzalan, Rafael David, Jerick Sese, Rolando Baluyut, Daniel Angelo Severano, at Narcito Cutchon Jr., ang buong tapang at dedikadong ginampanan ang tawag ng tungkulin sa gitna ng mga pinsala na dulot ng Super typhoon Uwan. Pormal na natapos noong ika-12 ng Disyembre 2025 ang kanilang misyon sa nasabing probinsya.

Malugod na sinalubong ng pamunuan ng TARELCO II ang pagbabalik ng kanilang mga kawani noong ika-15 ng Disyembre 2025. Pinangunahan ito nina Engr. Loreto A. Marcelino, Project Supervisor at Acting General Manager, at Engr. Antonio S. David, Board President, ang pagtanggap at pagkilala sa kanilang mahalagang ambag.

Ipinahayag ng pamunuan ang taos-pusong pasasalamat at mataas na pagpapahalaga sa ipinamalas na sipag, katapangan, at malasakit ng kanilang mga kawani hindi lamang para sa kanilang sariling kooperatiba, kundi maging sa mga kapatid na kooperatibang nangangailangan ng agarang tulong.

Ang matagumpay na paglahok ng TARELCO II sa Task Force Kapatid ay sumasalamin sa kanilang matibay na pangako na maghatid ng maaasahang serbisyo at malasakit sa mga kapatid ng kooperatiba. Sa pamamagitan ng sama-samang pagkilos, naibalik ang suplay ng kuryente na unti-unting nakakatulong sa panunumbalik ng normal na pamumuhay ng mga mamamayan ng Nueva Vizcaya.

Makabagong Bayani: Anim na linemen ng TARELCO II, rumesponde sa Masbate

Kimberly Aguilar | October 17, 2025

Matapang at handang hinarap ng anim (6) na magigiting na TARELCO II linemen, suot ang uniporme at tangan ang mabibigat nilang kagamitan, ang hamon ng Task Force Kapatid (TFK): Typhoon Opong.

Ginanap ang send-off ceremony para sa Region III electric cooperatives (ECs) noong Setyembre 30, 2025 sa PELCO III Main Office, Apalit, Pampanga, para sa mga 84 na ipinadalang linemen mula sa TARELCO II at 13 electric cooperatives sa ilalim ng Central Luzon Electric Cooperatives Association (CLECA) – na agarang tumugon sa panawagan ng rehabilitasyon sa probinsya ng Masbate.

Kasama sa mga nai-deploy ang TARELCO II linemen na sina Arnold Manguerra, Aaron Balatbat, Marnel Punzalan, Christian John Masiclat, Rogel Tiglao, at Rafael David na bumiyahe sa mismong araw na iyon patungong probinsya ng Masbate.

Sa hanay ng TARELCO II, dumalo sina Engr. Antonio S. David, TARELCO II Board President, at Ronnie B. Mangalindan, Officer-in-Charge, sa seremonya bilang suporta sa TFK at sa mga lineman ng TARELCO II na maghahatid ng mabilis na tulong teknikal sa mga lugar na napinsala ang kuryente bunsod ng kalamidad.

Sa kasagsagan ng programa, ipinahayag nina CLECA President Reynaldo V. Villanueva at National Association of General Managers Of Electric Cooperatives, Inc. (NAGMEC) Region III President Amador T. Guevarra ang taos-pusong pasasalamat at paghanga sa dedikasyon ng kanilang lineworkers. Anila, hindi biro ang trabahong ginagampanan ng mga lineman, lalo na sa mga panahong kailangan nilang iwan ang kanilang pamilya upang tumulong sa ibang rehiyon.

Tugon sa matinding pinsalang iniwan ng Bagyong Opong sa Masbate ang humigit-kumulang isang (1) buwang deployment ng TFK sa apektadong lugar kung saan maraming linya at poste ng kuryente ang winasak ng bagyo na nagdulot ng matagal na pagkawala ng suplay ng kuryente.

Matatandaang nagpadala rin ng mga lineman ang TARELCO II para sa TFK: Typhoon Emong na siyang nanalasa sa probinsya ng Pangasinan nitong Agosto 2025. Inabot ng labing-siyam (19) na araw ang kanilang deployment upang tulungang makabangon ang mga naapektuhan ng bagyo.

Sa bawat deployment ng TARELCO II linemen, hinihikayat naman nito ang mga Member-Consumer-Owners (MCOs) na ipanalangin ang kaligtasan, kalakasan, at tagumpay ng mga nakibahagi sa misyon – dahil sa pamamagitan ng Task Force Kapatid, mas abot-kamay ng mga komunidad ang mabilis na pagsasaayos at panunumbalik ng elektrisidad.

Muling pinatunayan ng mga lineman ng TARELCO II na ang diwa ng bayanihan at serbisyo ay buhay na buhay at hindi alintana ang panganib, basta’t makapagbigay ng liwanag sa mga nangangailangan sa panahong sinusubok ang lakas at katatagan ng ating mga pamayanan.

AGMA 2025, Dinagsa ng MCOs at Samu't Saring Personalidad

March 29, 2025

Pinuno ng mahigit-kumulang 13,000 na mga mahahalagang panauhin at member-consumer-owners (MCOs) ang TARELCO II MCO – NCECCO Hall sa Sto. Rosario, Concepcion, Tarlac para sa pinaka-inaabangang pagtitipon ng kooperatiba – ang 29th Annual General Membership Assembly noong Marso 29, 2025.

Bitbit ang unified theme ng Philippine Rural Electric Cooperatives Association, Inc. (PHILRECA) na “Beyond Power: Electric Cooperatives Empowering Communities, Changing Lives, umabot sa 10.30% kabuuang bilang ng MCOs ang dumalo base sa datos ng pangasiwaan.

Nakiisa sa unang bahagi ng programa ang PHILRECA, sa pangunguna ni Atty. Janeene Depay-Colingan – Executive Director at General Manager ng PHILRECA. Ibinahagi niya sa kanyang mensahe ang kahalagahan ng aktibong suporta at pakikilahok ng MCOs sa ngalan ng pagpapatuloy ng rural electrification.

Iginiit ni Atty. Colingan ang kahalagahan ng pagkakaroon ng tinig ng mga electric cooperatives sa Kongreso upang matiyak ang patas na representasyon at agarang matugunan ang pangangailangan ng MCOs at mga kooperatiba.

Mainit na pagsalubong sa mga bisita ang iginawad ng TARELCO II Board, Management, at Staff sa pangunguna ng dating General Manager na si Engr. Jose F. Bognot, Jr., at mga director na sina Engr. Antonio S. David (Concepcion District), Sonia B. Sangalang (Bamban District), Eliseo A. Rivera (Capas District), Joselito O. Sotto (La Paz District), at Francisco L. Gabriel, Jr. (Zaragoza District). Taas-kamay nilang inendorso ang adhikain ng PHILRECA para sa abot-kaya, maaasahan, at sapat na kakayahang maghatid ng kuryente.

Tiniyak naman ni GM Bognot sa mga MCO na mananatiling tapat, responsable, at bukas sa publiko ang buong TARELCO II Management sa operasyon nito.

Upang pormal na umpisahan ang pangalawang bahagi ng programa, sinimulan ni Concepcion-Director David ang pagbati sa mga MCOs at mahahalagang bisita na sina Tarlac 2nd District Representative Christian Yap-Sulit (kasalukuyang Tarlac Province Governor), Vice Governor Carlito S. David (kasalukuyang Tarlac 3rd District Board Member), at Concepcion Mayor Noel L. Villanueva.

Nagpaabot ng pagsaludo at pagbati ang mga nasabing lingkod-bayan sa libo-libong MCOs na naroon at sa buong kawani ng TARELCO II para sa humigit-kumulang apat na dekadang maayos na pamamalakad sa kooperatiba. Sa kanilang mensahe, umaasa silang mapanatili ang matibay na ugnayan ng TARELCO II at ng lokal na pamahalaan upang mas epektibo ang paglilingkod sa MCOs.

Matapos ang pahayag ng mga mahahalagang panauhin, inilatag ni GM Bognot ang kanyang ulat hinggil sa matagumpay nitong natapos na mga proyekto, estado ng operasyon, mga plano sa dumalong 13,134 MCOs. Sa ilalim ng kategoryang Financial Operations, umabot sa 97.23% ang grado ng TARELCO II sa Collection Efficiency sa taong 2024. Dahil sa mas mahigpit na pagpapatupad ng one-month disconnection policy, mas naging maagap sa pagbabayad ang mga MCO. Kaya naman noong 2024, bumaba sa 43.93 araw ang average collection period, mula sa 53.98 araw noong 2023, na nagpapakita ng mas mabilis na koleksyon ng bayarin. Binigyang-linaw ni GM Bognot na kahit mahigpit ang koleksyon, patuloy pa rin isinasaalang-alang ng pamunuan ang kapakanan ng mga MCO, kaya may 16 na araw na palugit bago putulin ang serbisyo ng kuryente.

Sa usapang systems loss, ibinahagi ni GM Bognot na umabot sa 9.31% ang Average Systems Loss – na pasok sa pamantayan ng Energy Regulatory Commission (ERC) kung saan hindi dapat ito lalagpas sa 10.25%. Nagtala naman ng ₱24.66 milyon na nabawas sa monthly rates noong 2024 dahil sa tulong ng Prompt Payor Discount na iginagawad sa TARELCO II para sa maagap nitong pagbabayad sa power suppliers. Ipinaabot din ang magandang balita na patuloy na bumaba ang average Power Rate, mula ₱12.1212 noong 2023 na naging ₱10.6245 ng noong 2024.

Natamo ng kooperatiba ang 98% Total Score sa Key Performance Standard ng National Electrification Administration (NEA) na tumumbas sa AAA Mega Large Category ng ahensya. Sa kabila ng natanggap na parangal ng TARELCO II sa 2024 NEA Lumens Awards, tuloy-tuloy ang determinasyon ng pangasiwaan na pagbutihin pa lalo ang operasyon at antas ng kooperatiba. Maliban sa NEA, ginawaran ng Philippine Rural Electric Cooperatives Association, Inc (PHILRECA) at San Miguel Global Power ng samu’t saring parangal ang TARELCO II para sa dedikasyon at mahusay nitong pamamalakad noong 2024.

Dakong inisyatibo ng kooperatiba, umabot sa 72 ang bilang ng Barangay Collection Agents (BCAs) sa 2024, higit sa bilang noong 2023. Tinatayang nasa 15% ng kabuuang koleksyon ng TARELCO II ang naipapadala ng mga BCA, na nagpapakita ng mahalagang kontribusyon nila sa operasyon ng kooperatiba.

Nakatuon ang pokus ng TARELCO II para sa mga susunod na taon sa mga renewable energy projects kabilang ang potensyal ng 10MW Waste to Energy project upang mapanatili ang ligtas at malinis na pinagkukunan ng enerhiya at kuryente. Kasabay nito ang pagpapanatili ng mga umiiral na pasilidad na tumutulong sa serbisyo para sa mga MCO, pati na ang pagkakaroon ng ECCO Bank sa tabi ng Main Office sa Concepcion na magsisilbing bangko ng mga miyembro.

Sa hanay ng benepisyo ng mga miyembro, iniulat ni GM Bognot natulungan ng Burial Assistance Benefit ang mahigit kumulang 1,000 pamilya nitong 2024. Muling ipinabatid sa ulat na mayroong diskwento sa bill ang mga Senior Citizens, 4Ps members, at ang mga kumikita ng mas mababa sa poverty threshold ayon sa Philippine Statistics Authority (PSA).

Ipinagmalaki ni GM Bognot ang aktibong pakikibahagi ng kooperatiba at TARELCO II Foundation, Inc. sa samu’t saring proyekto na nakakatulong sa komunidad. Isa dito ang pagpapailaw sa Sitio Manibukyot ng Bueno, Capas, Tarlac noong Enero 2025 – na bunga ng puspusang koordinasyon sa Tarlac I Electric Cooperative, Inc. (TARELCO I). Naglaan ng oras ang TARELCO II sa mismong araw ng AGMA para bigyan ng pagkilala ang mga benepisyaryo at residente ng Sitio Manibukyot sa entablado ng TARELCO II MCO-NCECCO Hall.

Gaganapin naman ang 30th AGMA ng TARELCO II sa Marso 27, 2026 sa parehong lugar na may temang, “TARELCO II Power: Governance Stronger, Service Smarter, Future Brighter.” Bilang handog sa mga dadalong MCOs, naghanda ng naglalakihang pa-premyo ang kooperatiba gaya ng: a) dalawampu’t dalawang (22) rice cooker; b) tatlumpu’t apat (34) na electric kettle; c) dalawampu’t dalawang (22) microwave oven; d) dalawampu’t pitong (27) 18 inches stand fan; e) dalawampu’t dalawang (22) 18 inches desk fan; f) labindalawang (12) 1-HP window type air-conditioning unit; g) labindalawang (12) 12kg twin-tub washing machine; h) labintatlong (13) 7.2 cu.ft 2-door refrigerator; i) labindalawang (12) 32 inches Smart LED TV; j) labing-apat (12) na 55 inches Smart LED TV at; k) walong (8) motorcycle with side car.